Inihayag ni Khalil Ramos ang Kapuso stars na hangad niyang makatrabaho, pati na rin ang aktres na gusto niyang maka-loveteam, bukod sa kaniyang real-life girlfriend na si Gabbi Garcia.
"I actually look up to so many Kapuso stars. Some that I grew up watching, for example I grew up watching the comedy skits of sir Bitoy (Michael V.)," saad ni Khalil sa Chika Minute report ni Nelson Canlas sa GMA News "24 Oras."
"For actors, one actor that I really look up to the most is si Kuya Dingdong (Dantes). He's an extremely talented actor," dagdag ng bagong Kapuso star.
Natanong din si Khalil kung sino ang mga aktres na gusto niyang maging leading lady.
"Ka-loveteam aside from Gabbi? Ang hirap naman ng tanong na 'yun. Siguro one would have to be Jasmine Curtis-Smith. She's a good friend. I'm also a fan of her work."
Gayunman, gusto pa ring makatambalan ni Khalil si Gabbi, kahit na "extra challenge" ang makatrabaho ang tao na pinakamalapit sa kaniya.
"Hindi kasi kami nag-meet on screen. We had no idea of each other's work ethics. We don't know the creative process in terms of acting," kuwento ni Khalil.
Pumirma ng kontrata si Khalil sa GMA Network nitong Martes.
Kasama sa pirmahan sina GMA Senior Vice President for Entertainment Group Lilybeth G. Rasonable, GMA Senior Assistant Vice President for Alternative Productions Gigi Santiago-Lara, GMA Artist Center Assistant Vice President and Head for Talent Imaging and Marketing Unit Simoun Ferrer, at GMA Artist Center Senior Talent Manager Joy Marcelo.
Nakilala si Khalil nang maging second-runner up siya sa isang talent competition.
Matapos nito, naging sunod-sunod na ang kaniyang TV series, pelikula, at music video.
Avid photographer din si Khalil, at CEO ng sarili niyang production house na "Limitless."
Ito rin ang nasa likod ng music video ng "All I Need" ni Gabbi.--FRJ, GMA News
