Bata man o matanda, nakipagsiksikan para makita ang mga bida ng daytime soap opera "Prima Donnas" na pinangungunahan nina Jillian Ward, Sofia Pablo, Althea Ablan, at Elijah Alejo.
Sa Chika Minute report ni Aubrey Carampel sa GMA News "24 Oras" nitong Lunes, napuno ng nagtitiliang fans ang back to back mall show ng mga bida ng top rating Kapuso afternoon series cast na ginanap sa Fisher Mall sa Malabon at sa Quezon Avenue nitong Linggo.
Kaya naman ang gumaganap na magkakapatid na Donnas na sina Jillian, Sofia at Althea, todo-bigay sa kanilang song numbers.
Kumanta rin sina Elijah, Will Ashley, Julius Miguel at si Katrina Halili.
Ang pagiging succesfull ng kanilang show ang itinuturing daw nilang blessing mula sa Diyos at kanilang labis na ipinagpapasalamat.
Katunayan sa bawat taping nila, hindi raw nila nakakaligtaang magpasalamat sa pamamagitan ng pagdadasal at pagkanta ng worship songs sa pamumuno ng kanilang direktor na si Gina Alajar.
Samantala sa episode ng naman ng serye nitong Lunes, idiin ng isang nagpakilalang witness na si Lilian ang suspek sa pagnanakaw ng kuwintas ng Donaria. Pero paniwalaan naman kaya ito ni Jaime?
-- FRJ, GMA News
