Isa namang Pinoy na kasali sa "Asia's Got Talent" ang nakakuha ng "golden buzzer" para dumiretso na sa semi-finals.
Napahanga nang husto ng batang si Eleana Gabunada ang sikat na composer na si David Foster dahil sa pag-awit niya ng "Rain on My Parade."
Napatayo at napapalakpak si David matapos ang pagkanta ni Eleana, na bibihira daw mangyari.
"There's a lot of people much older than you that could sing that song, but they don't understand the genre, they don't know what they're supposed to be doing. But somehow at age 10, you understand your mission, and you understand your job and there is no doubt in my mind that if you want to be on Broadway one day, you will be," saad ni David.
Tinawag naman ni Anggun na tila "baby Streisand" si Eleana sa kaniyang performance.
Nakuha rin niya ang boto ng Korean American singer na si Jay Park. "I think maybe you're the only act that has made David stand up. So I think that deserves a yes!"
Nang si David na ang boboto, hindi na siya sumagot ng "yes" at sa halip ay pinindot na ang golden buzzer.
Kamakailan lang, nakakuha rin ng golden buzzer ang Pinoy hand shadow puppeteer na si Shadow Ace mula sa mga host na sina Alan Wong at Justin Bratton (READ: Pinoy hand shadow puppeteer, nakakuha ng 'golden buzzer' sa 'AGT').-- FRJ, GMA News
