Pinalitan sa puwesto si Jaime Bautista bilang pinuno ng Department of Transportation (DOTr). Habang nagtalaga naman ng officer-in-charge sa Presidential Communications Office (PCO) matapos mag-leave ang acting secretary ng tanggapan na si Cesar Chavez.
Ngayong Huwebes, inanunsyo ni Executive Secretary Lucas Bersamin na si Vince Dizon ang magiging bagong pinuno ng DOTr bilang kapalit ni Bautista.
Dating presidente ng Bases and Conversion Development Authority (BCDA) at COVID-19 presidential adviser ng administrasyong Duterte si Dizon.
Ayon kay Bersamin, epektibo ang pagpapalit ng dalawa sa February 21, 2025, Biyernes.
"He is already authorized by the Office of the President to start the transition at the DOTr in coordination with the team of Secretary Jaime Bautista, who has resigned due to health reasons," saad ni Bersamin sa mga mamamahayag.
Sa isang pahayag, kinumpirma ni Bautista ang kaniyang pagbibitiw para bigyang atensyon ang kaniyang kalusugan.
"Sec. Bautista thanked the President for the opportunity to work in government which Bautista considered his most challenging stint," saad sa pahayag.
Tinawag ni Bautista ang kaniyang kauna-unahang posisyon sa gobyerno na "most enriching, having served with utmost integrity."
"Sec. Bautista looks forward to a smooth transition, after which a much needed vacation to recuperate from two and a half years of intense public service," ayon sa DOTr.
Chavez, naka-leave
Samantala, nag-leave naman ang pinuno ng Presidential Communications Office na si Acting Secretary Cesar Chavez.
Ayon kay Chavez, isang linggo umano ang kaniyang leave na mula Pebrero 17 hanggang 21.
Itinalaga bilang OIC ng PCO si Senior Undersecretary Emerald Ridao.
"As such, Senior Undersecretary Ridao shall take care of the day-to-day operations of the PCO, and if necessary, act for and on behalf of the Acting Secretary," saad sa inilabas na kautusan. —mula sa ulat nina Joahna Lei Casilao at Anna Felicia Bajo/FRJ,GMA Integrated News
