Arestado ang isang lalaking Chinese sa Makati City matapos umanong dukutin ang tatlong kapwa niya Chinese, ayon sa ulat ni Corinne Catibayan sa Unang Balita nitong Biyernes.
Nakitang nakaposas at nakakadena ang dalawang biktima sa bakal na bedframe sa isang kuwarto sa Barangay San Antonio. Isang babaeng biktima ang tadtad ng pasa sa katawan at may mga paso sa paa.
Ikinasa ang operasyon matapos makatanggap ang pulisya ng impormasyon tungkol sa isang lalaking nakaposas na palakad-lakad sa kalsada.
Naaresto sa operasyon ang itinuturong utak sa pagdukot sa mga biktima habang at-large pa rin ang lima nitong kasama. Kakasuhan siya ng kidnapping at serious illegal detention.
Humihingi raw ang mga suspek ng ransom mula sa pamilya ng mga biktima. —KBK, GMA News
