Muling nag-trending ang remake ng magkapatid na sina Bunak at Bilog ng video ng kanilang bangayan na kinagiliwan ng netizens noong 2017.
Sa TikTok account ni Bilog, na iniulat din ni Ian Cruz sa State of the Nation, mapanonood ang remake ng eksena nila ni Bunak.
Inaawit noon ni Bilog ang kantang "Noong Ako'y Bata Pa," nang makigulo si Bunak sa kaniyang likod.
Dahil dito, nakatikim si Bunak ng palo sa mukha mula sa kaniyang ate. Si Bunak naman, gumanti ng suntok sa likod kay Bilog.
Napansin naman sa remake ang glow up din ng magkapatid, kung saan mga tila dalaga at binata na sina Bilog at Bunak.
Pakiramdam naman ng netizens na sila na ang nakaramdam ng sakit sa likod, dahil sa tagal na ng video.
"FEEL KO ANG TANDA KO NA, ANG LAKI NYO NA HAHAHA" sabi ng isang netizen.
"HALA OMMMGGGGGGG SILA NA BA TALAGA TOOOO" anang isa pang netizen.
"[P]akiramdam ko tuloy ang tanda tanda ko na" sabi ng isa pa. — Jamil Santos/VBL, GMA Integrated News
