Nahuli-cam ang pagbangga ng isang motorsiklo sa isang lalaki na tumatawid sa pedestrian lane sa Jagna, Bohol.
Sa ulat ng GMA Regional TV Balitang Bisdak nitong Biyernes, makikita ang biktima na tumatawid sa pedestrian lane sa national highway sa Barangay Looc, dakong 7 am noong Martes, February 25.
Hindi pa man nakakaabot sa gitna ng kalsada ang biktima, bigla siyang bumalik at doon na siya nabangga ng motorsiklo.
Sa lakas ng pagkakabangga, parehong tumilapon ang rider ng motorsiklo at ang lalaking tumatawid.
Ayon sa awtoridad, parehong nagtamo ng injuries ang dalawa at dinala sa ospital.
Nagkasundo naman ang dalawa na wala nang magsasampa ng reklamo, at sasagutin ng rider ang pagpapagamot sa biktima. --FRJ, GMA Integrated News
