Palakpak at halakhak ang korona ng isang guest contestant dahil sa kaniyang pak na pak na performances sa isang beauty pageant sa Cebu.
Sa ulat ni Bernadette Reyes sa State of the Nation, mapapanood ang video ni Ms. Steffy Mendoza, na guest candidate sa Queen of Cotcot pageant sa Liloan, Cebu.
Candidate number 11 siya sa naturang paligsahan.
Nag-uumapaw sa confidence at stage presence si Ms. Steffy.
Tila nabighani maging ang serenader at nagpaubaya sa kaniyang karisma.
Pak na pak sa audience impact si Steffy dahil sa kaniyang mga agaw-eksena at panggulat na performances ng gabing iyon mula sa paglabas sa introduction, swimwear, at best in talent.
Tuwing lumalabas siya, naloloka maging ang judges at special guests.
Kinagiliwan na ng audience, nakatanggap pa si Ms. Steffy ng special award. —Jamil Santos/VBL, GMA Integrated News
