Kaugnay sa pagsisimula ng pagpaparehistro sa mga nais maging botante, sinabi ng opisyal ng Commission on Elections (Comelec) na na uunahin nilang mabigyan ng mga overseas Filipino kung ibabalik na ang pagbibigay ng voters' identification cards (ID).
"Kami po ay mag-uusap ngayong darating na Miyerkules sapagkat gusto muna natin, kung magbabalik tayo ng voters' ID, sa ating kababayang abroad muna kasi hindi sila ganoon karami," sabi ni Comelec chairman George Garcia sa panayam ng GMA News Unang Balita nitong Lunes.
"Sa susunod, tsaka tayo magpapa-issue ng mga voters' ID para sa ating mga kababayan dito naman sa Pilipinas, of course, depende sa budget na mabibigay sa atin ng Kongreso," dagdag niya.
Nagsimula ang voter registration ngayong Lunes na tatagal hanggang September 30, 2024. Bahagi ito ng paghahanda ng Comelec sa gaganaping mid-term elections sa 2025.
Idinaos din ngayong Lunes ang National Voter's Day na sinabayan ng mga aktibidad sa mga tanggapan ng Comelec para hikayatin ang publiko na magpatala at bumoto.
Inaasahan na aabot sa tatlong milyong Pinoy ang magpaparehistro sa buong bansa, at magiging bagong botante.
Humingi rin ng tulong ang Comelec sa mga pamunuan ng mga mall upang maipatupad ang kanilang programang Register Anywhere Project (RAP).
Dahil dito, maaaring magparehistro ang mga Pinoy sa RAP sa 170 malls sa buong bansa. —FRJ, GMA Integrated News
