Hinahanap ng mga awtoridad ang driver ng isang pickup truck na nahuli-cam nakasagasa sa isang rider sa Bacoor, Cavite noong Martes. Ang biktima, himalang nakaligtas.
Sa ulat ng GTV "State of the Nation" nitong Miyerkoles, madidinig ang sigaw ng mga nakasakay sa isang sasakyan na nakasaksi sa pagsagasa ng pickup truck sa nahandusay na biktima sa kalye.
Nakuhanan nila sa dashcam ang naturang insidente.
Sandaling tumigil ang pickup pero humarurot rin palayo kinalaunan.
Naisugod naman sa ospital ang biktima at kinalaunan ay nakauwi na rin.
Desidido raw ang biktima na magsampa ng reklamo laban sa driver ng pickup na patuloy na inaalam ang pagkakakilanlan.—FRJ, GMA Integrated News
