Sa nalalabing panahon ng kaniyang buhay, nais ng isang Briton na mayroong prostate cancer na muling makaugnayan ang dating kaibigang Pinoy at iwanan ng pamana na aabot sa milyones.

Sa episode ng “Kapuso Mo, Jessica Soho” nitong Linggo, sinabing umaabot sa 500,000 pounds o tinatayang P33 milyon ang yaman ng Briton na si Verne Mclean, na naninirahan sa Birmingham, England.

Nais ni Mclean na ibigay sa kaniyang kaibigang Pinoy na si "Mar" ang hanggang 10 porsiyento ng kaniyang yaman.

“I’m quite well-off, but not a multi-millionaire but I’m all right. I’m comfortable,” saad niya.

Kuwento ni Mclean, nakilala niya si Mar noong nagtatrabaho siya bilang crane operator sa Libya noong 1979.

Nang panahon na iyon, sa isang restaurant nagtatrabaho si Mar. At dahil marunong mag-ingles at masayahin, nakapalagayan niya agad ng loob ang Pinoy.

“His personality shone. He was a wise boy,” ani Mclean. “Absolutely brilliant. Always smiling, always joking. When you went in the house he was a certain life and soul to the party.”

Isa pang dahilan ng pagiging magkasundo nila ay pareho silang nanggaling sa hirap.

Pero nagkahiwalay na sila at nawalang ng komunikasyon nang bumalik na si Mar sa Pilipinas at nadestino naman si Mclean sa ibang bansa.

Isang sulat ni Mar sa kaniya ang pinakai-ingat-ingatan niya na hindi niya nagawang masagot noon.

“Mar wrote. I can’t write. He sent letters and he invited me over to Manila. I never responded. I’ve never written in my life. I mean, I couldn’t do anything. So I’ve got the letters. I’ve kept them to this day,” paliwanag niya tungkol sa sulat noong 1984.

Taong 2018, natuklasan ang kaniyang prostate cancer. Dahil dito, inisip na ni Mclean kung sino ang mga nararapat na tao na dapat niyang pamanahan at isa na rito si Mar.

“We talked more about it last year of contacting Mar ’cause I thought, maybe, he’s still there in Manila.’ He’s always resonated in my thoughts. I want to know how he is. He may have gone. He might be a multi-millionaire, but we don’t know, do we? But I really would like to track him and find out.  If I can catch him face-to-face and we can keep in touch. It would really be a blessing,” saad niya.

Mahanap at makausap pa kaya ni Mclean ang kaniyang kaibigang si Mar? Tunghayan ang episode na ito ng "KMJS."

--FRJ, GMA News