Nasawi ang isang Pinay matapos masalpok ng nakaw na Mercedes ang minamaneho niyang Tesla sa San Fernando Valley, Los Angeles, California nitong weekend.
Kinilala ng Los Angeles Medical Examiner ang biktima na si Christina David, 46-anyos.
Nadakip naman ng mga awtoridad ang 40-anyos na suspek na hindi tinukoy ang pangalan.
Hinahabol ng mga pulis ang suspek na sakay ng nakaw na Mercedes nang salpukin nito ang puting Tesla na minamaneho ni David.
Sa lakas ng pagkakabangga, natanggal ang bubungan ng Tesla. Dalawang sasakyan din ang nasalpok ng Tesla na nagresulta rin sa pagkakasugat ng mga sakay ng dalawang sasakyan.
Batay sa report ng medical examiners, kaagad na nasawi ang biktima sa pinangyarihan ng insidente.
Samantalang minor injuries lang ang tinamo ng suspek, na mahaharap sa kasong vehicular homicide.
Naulila ng biktima na isang commercial mortgage professional ang kaniyang asawa at dalawang anak.—, mula sa ulat ni Dave Llavanes Jr./FRJ, GMA Integrated News
