Muling pinatunayan ng GMA Network ang paghahatid nito ng ‘Serbisyo Totoo’ matapos manalo ng 10 major award sa 44th Catholic Mass Media Awards o CMMA.

Sa ulat sa Unang Balita nitong Martes, sinabing pinakita ng network ang dekalidad na tatak ‘Kapuso’ programs sa TV, radio at digital media dahil sa mga nakamit na mga parangal.

Sa telebisyon, ang “24 Oras” na CMMA hall of famer na bilang Best Newscast, ay muling kinilala at pinarangalan sa Best Special Event Category para sa komprehensibong pagtutok nito sa pananalasa ng Super Typhoon Odette noong December 2021.

Sa ikalawa namang sunod na pagkakataon, itinanghal naman na Best News Program ang late night newscast na “Saksi.”

Wagi rin bilang Best Drama Series/Program ang first wish granting program sa Philippine television ang “Wish Ko Lang.”

Samantala, Best Children and Youth Program naman ang “GMA Synergy's Stronger Together, Buo ang Puso: NCAA Season 97.”

Kinilala rin na Best Station ID ang GMA Christmas station ID na “Love Together, Hope Together” noong nakaraang taon.

Sa radio, kinilala bilang Best News Commentary ang “One on One: Walang Personalan” ng Super Radyo dzBB. Habang ang “Super Balita sa Umaga Nationwide” ay tinanghal bilang Best News Program.

Ginawaran din ng Best Public Service Program ang “SOS: Serbisyo on the Spot” at Best Entertainment Program ang “Barangay Love Stories” ng Barangay LS 97.1

Nanalo naman na Best Digital Advertising/Public Service ang “Limitless: A Musical Trilogy: Breathe” na tampok si Asia limitless star Julie Anne San Jose.

Bukod sa mga parangal na ito, nag-uwi rin ng Special Citations sa iba’t ibang kategorya ang ilang Kapuso programs gaya ng “The Jessica Soho Presidential Interviews” (Best TV Special); “I Juander" (Best Adult Educational/Cultural Program); “First Lady" (Best Drama Series/Program); GMA Regional TV Live (Best Public Service TV Program); at “Year of the Superhero" (Best TV Special).

Kasama rin sa mga nakakuha ng Special Citations ang “Bahay at Buhay Kasama si Lala Roque” (Best News Feature); “Sumasapuso Kasama si Toni Aquino” (Best Entertainment Program); at ang “Dapat Totoo” campaign GMA News and Public Affairs” (Best TV Advertisement/Public Service.)—Mel Matthew Doctor/LDF, GMA News