Ipinasilip ngayong Sabado ang teaser ng inaabangang pelikula na “Five Break-Ups and a Romance,” na pinagbibidahan nina Alden Richards at Julia Montes.
Sa Chika Minute report ni Aubrey Carampel sa 24 Oras Weekend nitong Sabado, mapapanood ang teaser kung saan ipinaliwanag ni Lance, karakter ni Alden, ang tungkol sa “Quantum Entanglement,” kung saan kapag entangled, palagi nang may epekto sa isa’t isa ang dalawang particle, kahit gaano man sila kalayo sa isa’t isa.
“Once we have that connection, we’re basically one,” sabi ni Lance. “It’s a very mysterious thing, like love at first sight.”
“Hindi ako naniniwala,” tugon naman ni Justine na ginagampanan ni Julia.
Sa direksyon ni Irene Emma Villamor, mapapanood na ang “Five Break-Ups and a Romance” sa mga sinehan sa Oktubre 18.
Present din si Alden at Julia sa pagpapalabas ng teaser launch sa Market! Market! sa Taguig City.
Bukod sa teaser, ipinakita rin ang poster at theme song nito.
Nagkaroon din ng performance sa teaser launch mula sa Sparkada heartthrob na si Michael Sager, na bahagi ng cast ng pelikula, at ang P-pop group na Yes My Love.
Present din sa event sina GMA Network Inc. Senior Vice President Atty. Annette Gozon-Valdes, Sparkle Vice President Joy Marcelo at senior talent manager Tracy Garcia. —Jamil Santos/VBL, GMA Integrated News
