Matapos ang "Ang Huling El Bimbo” ng Eraserheads, manghaharana naman sa susunod na taon ang Parokya Ni Edgar the musical.
Sa pagtatapos ng “Ang Huling El Bimbo” musical sa Newport Performing Arts theater, inawit ng full cast ang Parokya’s classic hit na “Harana.”
Habang kumakanta, makikita rin ang ilang simbulo na maiuugnay sa top hits ng OPM band.
Kabilang ang gitara para sa “Harana,” slice ng pizza para sa “Picha Pie,” bigote para sa “Mr. Suave,” bote ng beer para sa “Inuman Na,” at manok para sa “Chikinini.”
May lumitaw din na nakasulat na “Abangan 2024.”
Ibinahagi ni Dingdong Novenario, nagsulat ng “Ang Huling El Bimbo” musical, ang video ng naturang pagtatanghal sa Facebook.
“Reveal yourself!!!” saad niya sa caption, kasabay ng paglilinaw na hindi siya ang magsusulat para sa susunod na musical.
Sa Instagram, sinabi ni Parokya vocalist at “The Voice Generations” judge Chito Miranda na, “Ginawa nila 'to during the final curtain call ng ‘Ang Huling El Bimbo[.’] Nakakakilabot.”
Taong 2018 nang magsimula ang “Ang Huling El Bimbo” musical na tinugtog ang nasa 40 awitin ng banda. Muli itong ipinalabas sa treatro noong Abril.
Kasama sa cast sina Sparkle artist Anthony Rosaldo, Gab Pangilinan, Gian Magdangal, Bullet Dumas, Paw Castillo, at Topper Fabregas.—FRJ, GMA Integrated News
