Pabirong nilinaw ni Kuya Kim Atienza na hindi siya ang isa sa mga player ng nagkampeong Ateneo Blue Eagles sa UAAP Season 85 men's basketball, kundi si Dave Ildefonso.
Hindi naiwasan ng fans na makita ang pagkakahawig ni Kuya Kim kay Dave sa isang larawan ng binata na hawak ang tropeo matapos magwagi ang koponan ng basketball player.
Dahil dito, binati ng fans ng "congratulations" si Kuya Kim sa larawan ni Dave.
"Hindi ako yaaan," birong paglilinaw ng Dapat Alam Mo! host nang ibahagi niya ang larawan ni Dave.
"Sabi nang Hindi ako yaaan eh. Good morning FB fam," muling paglilinaw ni Kuya Kim sa comments section.
Sa ngayon, may higit 21,000 reactions at higit 700 comments ang post ni Kuya Kim.
Si Dave ang anak ng PBA legend na si Danny Ildefonso. —Jamil Santos/NB, GMA Integrated News
