May panibagong meme na kinaaliwan ang netizens nang may mag-edit sa larawan ni Doctor Octopus ng Spider-Man at ilagay ang mukha ng Kapuso actor na si Ronnie Henares.
Kamakailan lang, trending ang trailer ng upcoming movie na "Spider-Man: No Way Home," na makikita ang pagbabalik ng kontrabidang si Doctor Octopus, na ginampanan ng British actor na si Alfred Molina.
Sa naturang eksena, binanggit ni Doctor Octopus ang linyang "Hello, Peter," nang muli silang magkita ni Spider-Man.
Pero sa meme na ipinost ni Ronnie sa Instagram, sa halip na "Hello, Peter," ay "Pepiter, my friend!" ang nakasulat.
Hango ito sa sikat na linya ni Ronnie bilang si Tommy sa "Pepito Manaloto" na lagi niyang sinasabi ang, "Pepito, my friend!"
"Look what my son found on the net? Who do I thank for this? It’s ssooo cool!" caption ni Ronnie.
Sa Pepito Manaloto, gumaganap si Ronnie bilang isang financial analyst na laging nanlalamang sa mga tao, kabilang na si Pepito, na ginagampanan ni Michael V.
Kamakailan lang, nag-viral din ang meme ni Ronnie nang batiin niyang "my friend" si Hidilyn Diaz nang tumanggap ng milyong-milyong gantimpala nang masungkit ang unang medalyang ginto ng Pilipinas sa Olympics. --FRJ, GMA News
