Nabisto sa programang "Mars Pa More" ang "pet name" ni Allen Ansay kay Sofia Pablo, na tinawag niyang si "Aki."
Napag-usapan kasi sa programa ang pag-edit sa mga video post nila Allen at Sofia sa kanilang social media accounts.
"AlFia" ang tawag ng fans sa tambalan ng dalawa.
Ayon kay Allen, siya na ngayon ang nag-e-edit ng vlogs nila ni Sofia, na pabiro niyang ibinida na mas maganda na ngayon kaysa noong una.
"Thank you po kay Aki. Siya po nagturo sa akin," sabi ni Allen.
Sumagot naman si Sofia na natural lang na turuan niya si Allen dahil siya ang editor ng video noon.
Doon na napansin ng mga host ng programa na sina Camille Prats at Iya Villania, ang pagtawag ni Allen kay Sofia na "Aki."
Pag-amin ni Sofia, pet name sa kaniya ni Allen ang "Aki."
Biniro nina Camille at Iya si Allen na ang "Aki" ay pinag-igsing tawag na "akin" at tinatagalog ng binata ang English word na "mine."
Wala nang naisagot sina Allen at Sofia kung hindi ang tumawa.
Ikinuwento rin ng dalawa ang una nilang pagkikita sa set ng dating show na "Sunday PinaSaya" kung sinungitan ni Sofia si Allen dahil nakaupo ang binata sa kaniyang makeup chair gayung hindi pa siya tapos ayusan.
Panoorin sa video ang buong kuwento.
--FRJ, GMA News
