Wala pa ring masuwerteng mananaya na nakatama sa lumabas na number combination sa Grand Lotto 6/55 draw nitong Lunes ng gabi, July 4, 2022.
Sa website ng Philippine Charity Sweepstakes Office (PCSO), nakasaad na ang lumabas na mga numero ay 42-06-09-29-33-01.
Mayroon itong kabuuang premyo na P341,149,702.40. Sa Miyerkules, July 6, ang susunod na draw para sa Grand Lotto.
Ang naturang premyo sa Grand Lotto, ay isa na sa mga pinakamalaking premyo na puwedeng tamaan sa lotto ng PCSO.
Noong Oktubre 2018, dalawang mananaya ang naghati sa mahigit P1.1 bilyon na jackpot prize sa Ultra Lotto 6/58, nang tamaan nila ang lumabas na mga numero.
Solo naman na tinamaan ng isang mananaya ang mahigit P700 milyon premyo sa Grand Lotto 6/55 noong Nobyembre 2010.
Samantala, wala ring tumama sa Megalotto 6/45 draw nitong Lunes.
Ang mga lumabas na numero ay 04-33-07-40-21-06, at mayroon itong premyo na P17,790,627.40.--FRJ, GMA News
