Inihayag ni Alden Richards ang paghanga sa kaniyang leading lady sa “Five Break-Ups and a Romance” na si Julia Montes, na inilarawan niya bilang “ideal” at “walang kaplastikan.”
“Pumasok po agad ‘yung ideal. That’s how she is as a person. Ramdam mo ‘yon when you see her on screen,” sabi ni Alden sa panayam nila ni Julia sa Unang Hirit nitong Miyerkoles.
“Tapos very raw, walang pretension. Walang kaplastikan sa katawan,” dagdag pa ni Alden.
Si Julia naman, napansin ang kabaitan ng Asia’s Multimedia Star.
“Si Alden kapag nakikita mo naman siya sa screen talagang mabait eh. Kita mo na, nagra-radiate na ‘yon,” anang aktres.
Bukod dito, na-appreciate rin ni Julia ang pagkakaibigan nila ni Alden.
“Kaya ko na-appreciate ‘yung friendship kasi bibihira po akong magkaroon ng close talaga na guys. Isa siya roon. And talagang na-appreciate ko ‘yung personality niya off cam,” sabi ni Julia.
Sa trailer ng pelikula, ipinaliwanag ni Lance, karakter ni Alden, ang tungkol sa “Quantum Entanglement,” kung saan kapag entangled, palagi nang may epekto sa isa’t isa ang dalawang particle, kahit gaano man kalayo sa isa’t isa ang mga ito.
“Once we have that connection, we’re basically one,” sabi ni Lance. “It’s a very mysterious thing, like love at first sight.”
“Hindi ako naniniwala,” tugon naman ni Justine.
Sa direksyon ni Irene Emma Villamor, mapapanood na ang “Five Break-Ups and a Romance” sa mga sinehan sa Oktubre 18. -- FRJ, GMA Integrated News
