Agaw-pansin ang isang bride sa Cebu City nang dumating sa simbahan na nakaangkas sa motorsiklo.
Sa report ng GMA Regoinal TV Balitang Bisdak, na iniulat din sa Unang Balita nitong Biyernes, dumating ang bride na si Jessica Marie Lubay sa San Perdro Calungsod Church na nakaangkas sa motorsiklo, sa araw ng kanyang kasal.
Sobrang trapik umano sa araw na yun papunta sa simbahan at upang hindi siya ma-late sa kanyang kasal, iniwan ni Jessica ang bridal car at umangkas siya sa motorsiklo habang suot ang kanyang white bridal gown.
Laking gulat umano ng mga tao sa simbahan nang dumating si Jessica ng nakamotorsiklo. —LBG, GMA Integrated News
