Sinampahan ng two counts ng cyberlibel case sa Muntinlupa Regional Trial Court ang direktor na si Darryl Yap ng kaugnay ng kaniyang kontrobersiyal na biopic movie tungkol sa yumaong sexy actress na si Pepsi Paloma.
Sa isang impormasyon na may petsang Marso 17, inakusahan ng Office of the City Prosecutor ng Muntinlupa si Yap ng libel sa ilalim ng Article 353 at 355 ng Revised Penal Code, kaugnay ng paglabag sa Republic Act 10175 o Cybercrime Prevention Act of 2012.
Nag-ugat ang mga kaso mula sa teaser ng naturang upcoming movie ni Yap na “The Rapists of Pepsi Paloma.” Sa teaser na ipinalabas noong Enero 1, tinanong ng karakter ni Gina Alajar, na gumaganap bilang si Charito Solis, ang lead actress na gumaganap bilang si Pepsi Paloma, kung ginahasa siya ng actor-host na si Vic Sotto. Sumagot ang bida ng "oo."
Ayon sa city prosecutor, siniraan sa naturang eksena o teaser si Sotto.
“Thus, attributing or ascribing to the latter the commission of the crime against deceased actress Pepsi Paloma, or that said complainant was a rapist, thereby exposing the latter to public contempt, hatred, dishonor or ridicule or causing the latter’s reputation to be tarnished, to the damage and prejudice of said Marvic ‘Vic’ Sotto y Castelo.”
Inirekomenda ang piyansang P10,000 sa bawat bilang ng kaso.
Nitong nakaraang Enero, naghain si Sotto ng 19 counts of cyber libel sa Muntinlupa Office of the City Prosecutor laban kay Yap.
Saad ni Sotto sa reklamo na nakaramdam siya na “my right to privacy was being violated because this rape accusation is NOT TRUE and the dissemination of this wrong information is fooling a lot of people."
— mula sa ulat nina Vince Angelo Ferreras/Jamil Santos/FRJ, GMA Integrated News
