Inilahad ni Mikee Quintos ang aktor na pinagselosan noon ng kaniyang nobyong si Paul Salas.
Sa pagsalang ni Mikee sa "Talk or Taste" segment sa "Fast Talk with Boy Abunda" nitong Huwebes, binanggit ni Tito Boy ang pag-amin noon ni Kelvin Miranda na na-inlove siya kay Mikee nang magkasama sila sa series na "The Lost Recipe" noong 2021.
Dahil dito, tinanong ni Tito Boy si Mikee kung nagkaroon din ba siya feelings kay Kelvin.
Ngunit sa halip na sagutin ang tanong, sumabak na lang sa dare si Mikee na kumain ng mata ng isdang Salmon.
Sa sumunod na isyu, hinamon si Mikee na sabihin kung sino ang artistang pinagselosan ng nobyo niyang si Paul.
Dahil Barley ang kaniyang iinumin kung hindi siya sasagot, sinagot na lang ito ni Mikee ang tanong.
"Eh 'di 'yung minention niyo before this question," tugon ni Mikee, na tumutukoy kay Kelvin.
"Sorry babe, I love you! Don't be mad! Oh my gosh, magagalit 'yun!" sabi ni Mikee patungkol kay Paul tungkol sa kaniyang rebelasyon.
Going strong na ngayon ang relasyon nina Mikee at Paul, na nagdiwang ng ikatlo nilang anibersaryo bilang couple ngayong taon.
Kinumpirma ni Paul na dating sila ni Mikee noong 2022.-- FRJ, GMA Integrated News
