Wala pang 24 oras, umabot na kaagad sa mahigit dalawang milyon ang views sa Facebook ng mega trailer ng inaabangang "Voltes V: Legacy." Kaya naman ang direktor nito na si Mark Reyes, labis ang pasasalamat sa publiko.
Sa Instagram nitong Linggo, nag-post si direk Mark ng screen grab na nakasaad na, "2 Million views in less than 24 hours."
Patuloy niya, "Thank you for your appreciation for all our hard work."
Nasa mahigit 2.9 milyon views na ngayon sa Facebook ang naturang mega trailer na may haba na mahigit limang minuto.
Ipinalabas ang trailer sa GMA's New Year's eve countdown, at marami ang humanga sa ganda ng pagkakagawa nito.
Ang Kapuso comedian na si Michael V., sinabing naluha at kinilabutan siya nang mapanood ang trailer dahil nagbalik sa kaniyang alaala ang kaniyang kabataan.
Nakita na rin sa trailer kung gaano ka-star-studded ang cast ng Voltes V Legacy, na kabibilangan din nina Dennis Trillo, Carla Abellana, Max Collins at Albert Martinez.— FRJ, GMA Integrated News
