Tumanggap ng mga parangal sina Carla Abellana at Rafael Rosell, pati na rin ang kanilang Kapuso series na "Because of You" sa Face of the Year Awards sa Vietnam.
Sa Chika Minute report ni Aubrey Carampel sa GMA News "24 Oras" nitong Huwebes, sinabing wagi bilang Most Favorite Foreign Drama Series ang "Because of You" sa ikapitong taon ng awards.
Umere ito noong 2015 sa Pilipinas, at ipinalabas na rin sa Vietnam.
Itinanghal naman sina Carla at Rafael bilang Most Favorite Foreign Actress at Most Favorite Foreign Actor.
Pareho silang hindi personal na nakadalo sa awards ceremony sa Saigon Opera House nitong Miyerkoles dahil sa travel restrictions dala ng COVID-19 pandemic.
Gayunman, gumawa ng paraan sina Carla at Rafael ang pagkakataon na makapagpasalamat.
"The biggest thank you of course goes to all of you who voted, to the whole of Vietnam, to all our netizens who voted, thank you so much. And like they say in Vietnam, Xin Cam On," sabi ni Rafael.
"Thank you so much to all my Vietnamese fans, to all my Filipino fans and fans all over the world for voting for me online, I take this as a special milestone in my career. Again thank you so much IMC (International Media Company), thank you so much to the ETV, thank you very much Face of the Year Awards, thank you GMA,"
Pangalawang beses na ito na nanalo si Carla ng Most Favorite Foreign Actress Award.
Unang kinilala si Carla noong 2016 sa pagganap niya sa Kapuso series na "My Destiny."
Nominado rin sa awards ang iba pang Kapuso series at lead stars nito, tulad ng "Juan Happy Love Story" at Kapuso adaptation ng hit Korean series na "My Love From The Star."
Itinuturing ang Face of the Year Awards bilang isa sa prestihiyosong annual film and television awards sa Vietnam.
Si Marian Rivera ang unang Pinoy na kinilala sa award-giving body noong 2013.--Jamil Santos/FRJ, GMA News
