Kung P25 hanggang P120 ang presyo ng kilo ng saging sa Pilipinas, naipasubasta naman sa Amerika ang isang saging na naka-duct tape sa pader sa halagang mahigit P365 milyon.
Sa ulat ng "Balitanghali" nitong Biyernes, sinabing ito ang conceptual artwork ng Italian visual artist na si Maurizio Cattelan, na may titulong "Comedian."
Halagang $5.2 milyon ang final bid price nito, na nabili ng isang Chinese collector at founder ng isang cryptocurrency platform.
Bukod sa bidding price, magbabayad din ang nagwaging bidder ng karagdagang fees kaya umabot ng $6.2 milyon o mahigit P365 milyon ang kabuuang bayarin.—Jamil Santos/LDF, GMA Integrated News
