Asahan ang mataas na singil sa electricity bills ng Manila Electric Company (Meralco) ngayong Hunyo dahil umano sa "pass-through charges."
Sa pahayag nitong Martes, sinabi ng Meralco na magkakaroon ng “significant increase" sa overall rates sa June dahil sa mas mataas na pass-through charges, na kinabibilangan ng mas mataas na transmission charge.
Bukod pa rito ang pagtaas ng feed-in tariff (FIT) allowance na aprubado ng Energy Regulatory Commission (ERC).
Idinagdag pa ng Meralco ang manipis na suplay ng enerhiya sa Luzon grid na nakaapekto sa singil sa Wholesale Electricity Spot Market charge, na tatama naman sa singil sa generation charge.
“To cushion the impact of the rate increase to our customers, Meralco initiated the coordination with its suppliers to defer a portion of their generation costs,” ayon kay Meralco spokesperson and vice president for Corporate Communications na si Joe Zaldarriaga.
Iminungkahi umano ng Meralco na biyakin sa tatlong buwan ang koleksyon sa generation costs na mula Hunyo, Hulyo, at Agosto.
Hiniling din umano ng Meralco sa ERC na ipagpaliban ang koleksiyon sa bahagi ng WESM charges.
Dahil dito, inatasan ng ERC ang distributors sa Luzon at Visayas na hintayin ang final billing mula sa WESM operator Independent Electricity Market Operator of the Philippines (IEMOP) bago ilabas ang June billing.
“Meralco will comply with this directive and will wait for IEMOP’s adjusted billing before computing the final rates for June and issuing the bills to our customers,” ayon kay Zaldarriaga.
“With this, we also advise our customers to expect a slight delay in the delivery of their bills. We would like to give the assurance that these efforts are meant to mitigate the impact of the expected rate increase to all our customers,” dagdag niya. — FRJ, GMA Integrated News
