Nahuli-cam sa San Diego, California ang pakikipaglambingan ng isang asong golden retriever sa isang lalaki na nagnakaw sa bisikleta ng kaniyang amo.
Sa ulat ng GMA News Saksi nitong Miyerkules, makikita na paalis na ang kawatan dala ang bisikleta na kinuha niya sa garahe ng biktima.
Ngunit napatigil ang kawatan nang makita niya ang aso na nakasunod sa kaniya.
Pero sa halip na tumahol, nagwagwag ang buntot ng aso at nakipaglambingan sa kawatan.
Matapos na laruin at kamutin ng kawatan ang tiyan ng aso, umalis na ito tangay ang bisikleta habang nakamasid sa kaniya ang golden retriever.--FRJ, GMA Integrated News
