'Di hamak na mas masuwerte umano ang 2023 kaysa sa nakalipas na taon, ayon sa isang Feng Shui master. Itinuturing din niya na taon ngayon ng pag-ibig pero may mga dapat daw mag-ingat sa sex scandal.
Sa episode ng "Unang Hirit" nitong Lunes, sinabi ng Feng Shui master na si Marites Allen, na Year of the Water Rabbit ang 2023. Ito rin daw ang "Center Star of the Year" kaya maganda ang 2023 pagdating sa usapin ng pag-ibig.
"Ito 'yung taon ng pag-ibig. Ito 'yung peace, harmony, reconciliation," sabi ni Marites patungkol sa anumang usapin sa puso.
"If there are families out there na kailangan ng reconcillation, this is the time na puwede silang magkabalikan," paliwanag niya.
Dahil Year of Water Rabbit ang 2023, maganda rin umano na mabuntis ngayong taon.
"The rabbit produces a lot of babies. Kung nagpipigil kayo manganak nung pandemic, ito na hanggang Year of the Dragon," payo niya.
Gayunman, nagbabala si Marites sa mga isinilang sa Year of the Rat at Rooster na mag-ingat sa mga sex scandal.
"Kung ang partner mo ay Rat and Rooster, mag-ingat kayo," paalala niya.
Alamin sa video ang mga pang-angkit umano sa suwerte gaya ng kulay sa taong 2023. Panoorin. —FRJ, GMA Integrated News
