Mangingisda mula sa Quezon na 46 araw nang nawawala, nasagip sa karagatan ng Batanes

Isang mangingisda na mula sa Infanta, Quezon na 46 na araw nang nawawala at nagpalutang-lutang sa dagat, ang nasagip sa karagatang sakop ng Batanes. Ang mangingisda, nakaligtas dahil sa pag-inom sa tubig-ulan at "napupulot" na mga niyog sa dagat.

Sa Vincent John Abordo sa GMA Regional TV News, sinabing nasagip ang mangingisdang si Robin Dejillo, 49-anyos, ng mga tauhan ng Philippine Coast Guard (PCG) nitong Huwebes.

Nakita si Dejillo ng mga tauhan ng PCG, na nasa 15 kilomentro ang layo mula sa dalampasigan ng Batan Island.

Agosto 4, nang mawala si Dejillo nang maubusan ng krudo ang kaniyang bangka at hindi nagawang makabalik sa kaniyang mother boat.

Tinangay ng alon ang bangka ni Dejillo at ilang linggo siyang nagpalutang-lutang sa dagat.

"He survived for more than a month at sea by drinking rainwater and eating fish. He was also sustained by coconuts floating on water," ayon sa PCG.

Hinatak ng PCG ang bangka ni Dejillo sa pantalan ng Basco, Batanes, at inayos ng Provincial Disaster Risk Reduction and Management Office (PDRRMO) ang pagdala sa kaniya sa Batanes General Hospital.

Kapag natiyak nang maayos ang kaniyang kalagayan, plano ng Coast Guard na ibiyahe na siya pauwi sa Infanta, Quezon.--FRJ, GMA Integrated News