Sapul sa CCTV ang ginawang pagnanakaw ng isang lalaki sa isang kambing sa gilid ng isang bahay sa Mangaldan, Pangasinan.
Sa ulat ni Jeric Pasiliao ng GMA Regional TV, na iniulat din sa Balitanghali nitong Biyernes, mapanonood sa footage na nakatali pa ang kambing.
Ilang saglit lang, dumating na ang salarin, inalis ang tali, bago binuhat ang kambing saka umalis.
"'Yung [anak ng kambing] umiiyak, sabi ko 'Asaan ang nanay niyan?' 'Ewan ko baka [gumala lang] o kaya naalis sa lubid. Iyon pala, wala na, kinuha na. Tiningnan sa CCTV, binuhat ang kambing na parang bata," sabi ni Jackie Mercado, may-ari ng kambing.
Bago naganap ang insidente, mapanonood din sa CCTV footage na dalawang ulit na nagpabalik-balik ang suspek na sakay ng tricycle.
Patuloy na inaalam ng kapulisan ang pagkakakilanlan ng suspek na tumangay sa kambing. — Jamil Santos/RSJ, GMA Integrated News
