Pumanaw na ang dating aktres na si Janet Bordon, ayon sa kaniyang kapatid. Siya ay 61-taong-gulang.
Ang malungkot na balita ay ibinahagi sa Facebook post nitong Huwebes ni Rozel, kapatid ni Janet.
“Our so loving sister Janet passed at around 10:07pm today and she is now with the Lord and with our [loved] ones,” saad ni Rozel. “No more pain Ate Net. We Love You so Much ATe Net.”
Ayon kay Rozel, nakipaglaban sa sakit na cancer ang dating aktres.
“She battled cancer for 31 [years] and [nine] major operations since,” pagbahagi niya. “On behalf of our family, thank you for all your prayers.”
Ayon sa ulat ng PEP.ph, sa San Francisco, California naninirahan si Janet.
Kabilang sa mga pelikulang ginawa ni Janet ay “Ako Si Emma, Babae!,” katambal si Rudy Fernandez.
Ang “Moises Platon” na pinagbidahan ni Bong Revilla ang huling pelikulang ginawa umano ni Janet.
Ilan pa sa mga pelikulang pinagbidahan niya ay ang “Virgin People,” “Tatak Yakuza,” “Star,” at “4 Na Maria.”– FRJ, GMA News
