Ngayong Kapuso na, inihayag ni Richard Yap ang mga Kapuso star na hangad niyang makatrabaho. Kabilang na rito ang matagal na raw niyang pinapanood sa "Bubble Gang" na si Michael V.
Ayon sa aktor, nais niyang subukan ang tema ng comedy at action sa kaniyang mga magiging proyekto.
"We're planning to experiment into all genres right now. We can do comedy, we can do action, we can do romcom again. We're really open to doing anything right now to see what fits and what works with us," paliwanag niya.
Inamin ng Chinoy actor na tagasubaybay siya ng long-running gag show na "Bubble Gang" kaya gusto sana niyang makatrabaho si Michael V o Bitoy.
"Siguro... I've been following Bubble Gang for a long time, ever since I was how many years ago was that...so Michael V. is one of the male actors that I would like to work with," saad niya.
Sa mga Kapuso leading lady, sinabi ni Richard na marami siyang hangad na makatrabaho tulad nina Marian Rivera, Heart Evangelista, Lovi Poe, Rhian Ramos, at Carla Abellana.
Pero nang tanungin kung sino ang nais niyang makapareho sa isang romcom project, saad ng aktor, "Kahit sino naman sa kanila, it's a parang nakakahiya naman kung ako pa pipili."
"I've worked with Jean Garcia in a movie and we had a lot of fun working also so I'm really looking forward to working with all of these artists I've never worked with before," kuwento niya.
Pumirma ng kontrata bilang Kapuso si Richard nitong Miyerkules.—FRJ, GMA News
