Sanya, Rocco at Valeen, kabilang sa bagong proyekto ng TBA Studios

Magiging bahagi sina Sanya Lopez, Rocco Nacino, at Valeen Montenegro ng pinakabagong proyektong inihahanda ng TBA Studios.

Sa kanilang Facebook post, binigyan ng TBA Studios ng pag-welcome ang tatlong Kapuso stars sa kanilang mga bagong gagampanang "karakter."

"It's time for a Spring Cleaning. COMING SOON," caption ng commercial film outfit, na nagpapahiwatig ng kanilang teaser ng proyekto.

Bago nito, nakasama na rin si Rocco sa pelikulang "Write About Love" na handog din ng TBA Studios.

Nakatambal ni Rocco si Sanya sa GMA afternoon series na "Haplos," at sila rin ang gumanap na sina Aquil at Danaya sa 2016 remake ng "Encantadia."

Ang TBA Studios ay binubuo ng Tuko Film Productions Inc., Buchi Boy Entertainment at Artikulo Uno Productions, na nasa likod ng mga critically-acclaimed na pelikulang "Heneral Luna," "Birdshot," at "Goyo." --FRJ, GMA News