Aabot umano sa 20 taga sa katawan ang tinamo ng isang 26-anyos na lalaki na nahukay ang bangkay sa bakanteng lote sa Ibaan, Batangas. Ang suspek sa krimen, ang dalawang tiyuhin ng babae na kinakasama ng biktima.
Sa ulat ni Mariz Umali sa GMA News TV "Balita Pilipinas" nitong Martes, kinilala ang biktima na si Ranny Romano, na nakita ang bangkay sa bakanteng lote sa Barangay San Agustin.
Naaresto naman dalawang suspek na sina Ricky Dollendo at Salvador Pablo, na idinahilan na self-defense ang kanilang ginawa dahil nag-amok umano ang biktima.
Base sa imbestigasyon ng pulisya, lumilitaw na nag-away umano ang biktima at kinakasama nito na pamangkin ng mga suspek.
Nang malaman umano ng dalawang suspek ang nangyaring away, ipinaghiganti nila ang pamangkin hanggang sa mapatay ang biktima.
Pero sabi ni Pablo, pinagtangkaan siyang patayin ng biktima at mabuti na lang daw na dumating si Dollendo kaya siya nasaklolohan at nakaligtas.
Dugtong naman ni Dollendo, armado umano ng patalim ang biktiama at tinututukan ng patalim ang mga babae at pati bata.
"Tapos 'yung asawa niya iningudngod niya pa kaya putok ang nguso. Tapos naglaslas siya dito sa pulsuhan, nu'ng kami ay dumating duguan na siya, nag-aamok talaga ng away, pinalalabas kung sino ang matapang," paliwanag niya.
Nahaharap sila sa reklamong murder ang dalawa at wala pang pahayag ang pamangkin nila na live-in-partner ng biktima.-- FRJ, GMA News
