Sa ospital ang tuloy ng babaeng Vietnamese na nagdiriwang ng kaarawan matapos malapnos ang bahagi ng kaniyang mukha nang magliyab ang hydrogen balloon na nadikit sa kandilang may sindi na nasa cake.
Sa ulat ng GMA News "24 Oras" nitong Martes, makikita ang babaeng may birthday na hawak niya sa isang kamay ang maliit na cake na may sinding kandila na kaniyang ihihipan.
Hawak naman niya sa kabilang kamay ang hydrogen balloon.
Ihihipan na sana ng babae ang kandila nang aksidenteng dumikit ang lobo sa kandila at nagliyab.
Nagtamo ng first and second degree burns sa mukha ang babae. Nalapnos din ang kaniyang talukap pero hindi naman naapektuhan ang kaniyang paningin.
Ayon sa babae, nakalimutan siyang sabihan ng organizers na puwedeng magliyab ang hydrogen balloon hindi gaya ng ibang lobo na karaniwang hangin ang laman. --FRJ, GMA Integrated News
