Kukuha ang Department of Migrant Workers (DMW) ng 100 Pinoy caregivers na ipadadala sa South Korea, sa ilalim ng caregiver Pilot Project.
Ayon sa DMW, ang mga papasang caregiver ay tutulong sa pamilya sa South Korea sa pag-aalaga ng bata, o pag-alalay sa buntis, o sa pag-aasikaso ng mga gawain sa bahay.
Sisimulan ng DMW ang registration para sa mga interesado simula sa May 9, Huwebes, hanggang May 10, Biyernes.
Kailangan ipakita ng aplikante ang kanilang Technical Education and Skills Development Authority (TESDA) National Certificate (NC) II Caregiving Certificate.
Ang mga aplikante ay dapat nasa edad 24 hanggang 38.
"Selected applicants will undergo comprehensive medical, psychological, language, and physical tests. They will receive pre-departure and post-arrival training sessions," ayon pa sa DMW.
"Prospective Korean families will also attend the orientation sessions," dagdag nito.
Ang caregiver Pilot Project ay nakapaloob sa Employment Permit System (EPS) ng South Korea. Sa naturang sistema, pinapayagan ang Korean employers na kumuha ng dayuhang manggagawa kung wala sa kanilang local workers ang interesado sa trabahong iniaalok.
"The project aims to expand bilateral labor ties between the Philippines and Korea and assess the feasibility of a larger caregiver deployment plan between the two countries," ayon sa DMW. — FRJ, GMA Integrated News
