Nahuli-cam sa Caloocan City ang pagkatok ng isang lalaki sa isang bahay. Nang lumabas ang isang bata, binigyan niya ito ng barya at sumenyas na tila pinapalayo mula sa bahay ang paslit.
Sa ulat ni Maki Pulido sa GMA News “24 Oras” nitong Miyerkules, ikinuwento ng babae na itinago sa pangalang “Liza,” na sinilip niya ang CCTV camera sa labas ng kanilang bahay nang madinig niyang may kumatok.
Doon na niya nakita ang isang lalaki na sumisilip sa bintana upang tingnan kung sino ang nasa loob.
Dalawang bata na nasa sala ng bahay ang lumabas at hinarap ang lalaki na naglabas ng barya at ibinigay sa kanila.
Mapapansin din na may sinesenyas ang lalaki sa batang lalaki na limang-taong-gulang na tila inaaya ito na pumunta sa itaas na palayo sa bahay.
Dito na naalarma si “Liza” at kaagad na pinuntahan ang lalaki.
“Nung na-convince niya lumabas yung isang bata, binigyan po niya ng pera, pagbigay sinenyasan niya na umakyat sa taas,” ani Liza.
Nang tanungin ni Liza ang lalaki kung bakit niya binigyan ng barya ang bata, tila umarte raw ito na pipi.
Habang pinababalik umano ni Liza sa loob ng bahay ang mga bata, bigla raw umalis ang lalaki.
Dahil sa nangyari, nangangamba ngayon ang ina ng batang lalaki dahil tila nais umanong dukutin ang kaniyang anak.
“Natakot para sa anak ko kasi lagi naman sila naglalaro dito kahit walang bantay, panatag ako kasi tapat lang ng bahay malayo sa kalsada,” anang ginang.
Ini-report na ng pamilya sa pulisya ang insidente police precinct na nakasasakop sa Barangay 180 sa North Caloocan.
Magsasagawa umano ng imbestigasyon ang pulisya sa insidente. —FRJ, GMA Integrated News
