Nagbigay muli ng paalala ang Thailand nitong Huwebes kaugnay sa matinding init ng panahon na nararanasan sa kanilang bansa. Ngayong taon, umabot na umano sa 30 ang nasawi dahil sa heatstroke, na malapit nang maabot ang kabuuang bilang nasawi sa heatstroke noong 2023.

Sa ulat ng Agence France-Presse, nagbabala ang awtoridad sa Bangkok kaugnay sa heat index na posibleng umabot sa mahigit 52 degrees Celsius (125 degrees Fahrenheit).

Ang temperatura sa kabisera ng Thailand nitong Miyerkules, pumalo sa 40.1 C, na inaasahang mararamdaman pa rin ngayong Huwebes.

Dahil sa matinding mainit ng panahon sa ilang bahagi ng South at Southeast Asia ngayong linggo. Gaya sa Pilipinas na sinuspinde ang ilang face to face classes, habang nagdarasal na sa pag-ulan ang mga taga-Bangladesh.

Ang opisyal ng environment department ng Bangkok, nagbabala sa heat index nila o damang-init na "extremely dangerous."

Nagbabala rin sa matinding init ang mga awtoridad sa Udon Thani province ngayong Huwebes.

Nitong Miyerkules, inihayag ng kanilang health ministry na 30 katao na ang nasawi sa heatstroke mula Enero 1 hanggang Abril 17. Hindi na ito nalalayo sa 37 nasawi sa heatstroke sa buong 2023.

Sinabi sa AFP ni Direk Khampaen, deputy director-general ng Department of Disease Control ng Thailand, na inabisuhan nila ang mga nakatatanda nilang mga kababayan, at ang mga may underlying medical conditions, pati na ang mga obese na manatili sa indoor at regular na uminom ng tubig.

Ang Abril umano ang karaniwang pinakamainit na parte ng taon sa Thailand, pati na sa ibang bansa sa Southeast Asia. Pero ang init, pinatindi ng El Niño phenomenon.

Sa lalawigan ng Lampang sa Thailang, umabot umano ang temperatura sa 44.2 C, na malapit na sa 44.6 C na naitalang all-time national record noong 2023.

Ang katabi nitong bansa na Myanmar, umabot ang init sa 45.9 C nitong Miyerkules, na inaasahang mararamdaman pa rin sa Huwebes.

Sa Pilipinas, nagbabala ang PAGASA nitong Huwebes, na 30 lugar sa Pilipinas ang nasa "dangerous" heat index sa Biyernes.

Sa heat index forecast ng PAGASA, papalo umano sa 42°C hanggang 47°C ang temperatura sa mga sumusunod na lugar:

42°C

    Science Garden, Quezon City
    Tayabas City, Quezon
    Virac (Synop), Catanduanes
    Alabat, Quezon
    Roxas City, Capiz
    Malaybalay, Bukidnon
    Cotabato City, Maguindanao del Norte

43°C

    NAIA, Pasay City
    Sinait, Ilocos Sur
    MMSU, Batac, Ilocos Norte
    ISU Echague, Isabela
    Iba, Zambales
    CLSU Muñoz, Nueva Ecija
    Ambulong, Tanauan, Batangas
    San Jose, Occidental Mindoro
    Puerto Princesa, Palawan
    CBSUA-Pili, Camarines Sur
    Dumangas, Iloilo
    La Granja, La Carlota, Negros Occidental
    Dipolog, Zamboanga del Norte

44°C

    Laoag City, Ilocos Norte
    Tuguegarao City, Cagayan
    Coron, Palawan
    Legazpi City, Albay

45°C

    Bacnotan, La Union
    Cubi Point, Subic Bay, Olongapo City
    Sangley Point, Cavite

46°C

    Aparri, Cagayan
    Aborlan, Palawan

47°C

    Dagupan City, Pangasinan

May pinakamababang heat index prediction sa Baguio City, Benguet at BSU, La Trinidad, Benguet na 29°C. — ulat mula sa AFP/FRJ, GMA Integrated News