Ruru Madrid, thankful sa suporta ng mga manonood sa 'Green Bones'

December 26 2024

By DIANNE MARIANO

Kasalukuyang napapanood sa mga sinehan ang inspirational-drama film na Green Bones, na pinagbibidahan nina Dennis Trillo at Ruru Madrid.

Ang naturang pelikula ay ang official entry ng GMA Pictures at GMA Public Affairs sa 50th Metro Manila Film Festival.

Sa Instagram post ni Ruru, labis ang pasasalamat niya sa Panginoon dahil higit pa sa kanyang mga pangarap ang natupad.

“Panginoon, salamat po ng taos-puso sa Inyo. Hindi Niyo lang tinupad ang mga pangarap ko, kundi binigyan Niyo pa ako ng higit sa aking inaasahan. Tunay na napaka-buti Niyo, Ama.

“Sa Inyo po ang lahat ng kapurihan at pasasalamat! Hindi ko po makakalimutan ang araw na ito—isang patunay na walang imposible sa Inyo,” sulat niya sa caption.

Thankful din ang Kapuso actor sa lahat ng nagmahal at sumuporta sa unang araw ng pagpapalabas ng kanyang pinagbibidahang pelikula.

“Maraming salamat po sa lahat ng nagmahal at sumuporta sa unang araw ng Green Bones! Dahil sa inyo, naging napaka-successful ang unang araw—sold out ang mga sinehan at umaapaw ang positibong feedback. Lubos po ang aming pasasalamat sa inyong lahat,” patuloy niya.

Samantala, sa panayam ni Nelson Canlas kina Dennis at Ruru, puno ng pasasalamat ang dalawang lead stars hindi lamang sa suportang natatanggap ng Green Bones, kundi maging sa pagdami ng screening ng kanilang pelikula.

“Happy holidays po sa inyong lahat, siyempre masayang-masaya na ganito 'yung pagtanggap ng mga tao dun sa pelikula namin, at mas marami pa lalo 'yung nanonood kaya thankful sa inyong lahat, salamat po,” ani Dennis.