Lalaking nagbanta umano na ikakalat ang pribadong larawan at video ng ex-gf, arestado

Arestado sa entrapment operation ng mga awtoridad sa Montalban, Rizal ang isang lalaki dahil sa pagbabanta umano na ikakalat ang pribadong larawan at video ng dating nobya kung tatanggi itong makipagtalik sa kaniya.

Sa eksklusibong ulat ni John Consulta sa GMA News “24 Oras Weekend,” inaresto ang suspek ng mga National Bureau of Investigation-Violence Against Women Division.

Hindi napigilan ng mga kaanak ng 19-anyos na biktima na maging emosyonal nang mahuli ang suspek, dagdag pa ng ulat.

Ayon sa NBI, gusto raw ng suspek na makipagtalik sa kanya ang biktima at kapag hindi raw ito pumayag may gagawin daw itong bwelta.

“Sinasabi nga na ikakalat niya ang kanyang mga sensitibong larawan at mga videos at tinatakot din na papatayin ang kanyang pamilya at kanyang nanay,” saad ni NBI spokesperson Gisele Garcia-Dumlao.

Sinisikap pa ng GMA Integrated News na makuha ang panig ng suspek na nakakulong ngayon sa NBI Detention Facility.

Nahaharap siya sa reklamong Violence Against Women and Children, Photo and Voyeurism Act at Grave Threats.

“Dahil nga sa ginagawang online na blackmailing itong ating subject sa kanyang victim, napakahalaga na kapag mayroong mga ganitong pangyayari ay magsumbong agad sa ating opisina para maaksyunan namin ito agad,” ani Garcia-Dumlao. — Mel Matthew Doctor/BM, GMA Integrated News