Bodega ng sigarilyo sa Marikina, nasunog

Sumiklab ang sunog sa isang commercial warehouse sa Marikina City pasado alas-dos ng madaling-araw nitong Huwebes.

Batay sa ulat ni Bam Alegre sa Unang Balita, umakyat sa ikalawang alarma  ang sunog ilang minuto lamang matapos sumiklab ang apoy dahil sa maraming tambak umano ng papel ang sa nasabing bodega sa Barangay Nangka.

Ayon sa ulat, nagsisilbing packaging establishment ng isang cigarette brand ang warehouse, at karamihan ng laman nito ay mga papel.

Hindi pa umano nakapagbigay ng pahayag ang may-ari ng bodega at hinihintay pa nitong tuluyang maapula ang apoy at matapos ang mopping-up operation ng mga awtoridad. —LBG, GMA News