10 pamilya, nawalan ng tirahan sa sunog sa Novaliches

Nawalan ng tirahan ang 10 pamilya sa Novaliches, Quezon City dahil sa sunog na sumiklab madaling-araw nitong Biyernes.

Iniulat ni James Agustin sa Unang Balita na nangyari ang sunog sa Barangay Gulod pasado alas-dos ng umaga.

Apat na kabahayan na gawa sa light materials ang sinira ng apoy at apektado ang 10 pamilya.

Lubhang apektado naman ang isang jeepney na nakaparada sa gilid ng isang bahay na naabot ng apoy.

Ayon sa Bureau of Fire Protection, umabot sa unang alarma ang sunog na naapula matapos ang 40 minuto. —LBG, GMA News