Pagnanakaw ng P20,000 na barya sa carwash machine, nahuli-cam

Nakunan sa CCTV camera ang pagnanakaw ng dalawang lalaki sa isang automated carwash machine sa Oriental Mindoro.

Makikita sa video sa ulat ni Pia Arcangel sa 24 Oras nitong Linggo na kinakalikot ng mga suspek ang makina na naglalaman pala ng aabot sa P20,000 na barya.

Mapapansing sa unang subok, nahirapan ang mga lalaki na buksan ito kaya't naglakad muna sila palayo rito. Nakaabang naman ang isang tricycle kasama ang iba nilang kasabwat.

Agad din naman nila itong binalikan at nakuha nila ang libo-libong barya.

Handa namang magbigay ng pabuya ang may-ari ng makina sa kung sino man ang makakapagbigay ng impormasyon tungkol sa mga suspek. — Anna Felicia Bajo/BM, GMA News