Tricycle driver, nakipag-agawan ng susi sa pulis sa Abra  

Nakipaghablutan ng susi sa pulis ang isang driver ng tricycle sa bayan ng Bangued sa Abra, matapos niyang sadyang banggain ang nakaparadang motorsiklo.

Nauna rito, binangga ng tricycle driver ang nakatabing motosiklo ng kanyang nakaalitan na rider na pumarada sa tapat ng kalapit na police assistance center.

Agad na nilapitan ng pulis ang driver at kinumpiska ang susi ng kanyang tricycle habang inaayos ang gusot. 

Pero biglang hinablot ng drayber ang susi mula sa kamay ng pulis.

Ayon sa ulat, pinagmumura rin ng drayber ang mga pulis, pero mahigpit na pinaiiral ng Abra police ang maximum tolerance.

Pahayag ng drayber, sadya raw talagang binangga niya ang motorsiklo ng rider dahil nagkaalitan sila sa daan. Huminto ang rider sa tapat ng police assistance center para magsumbong.

Ayon sa mga pulis, tila nakainom ang drayber, na ngayon ay nakadetine habang iniimbestigahan ang nangyari. —LBG, GMA News