Preso, nakatakas matapos magpanggap na dalaw

Nahuli-cam ang pagtakas ng isang preso mula sa Cebu Provincial Detention and Rehabilitation Center. Ang pugante, walang kahirap-hirap na nakalabas ng piitan matapos magpanggap na dalaw.

Sa ulat ni Lou Anne May Rondina ng GMA-Cebu sa Balita Pilipinas nitong Miyerkules, ipinakita ang bahagi ng kuha ng CCTV sa loob ng CPDRC na makunan ang paglabas ng puganteng si Arnel Mait.

Kapansin-pansin na hindi na nakasuot ng kanyang prison uniform si Mait at dumaan pa sa harap mismo ng guwardiya.

Ayon sa mga awtoridad,  sumabay si Mait sa paglabas ng mga dalaw nitong Lunes, dakong 6:00 am.

Pinayagan umano ang mga dalaw na mag-overnight sa kulungan sa weekend at pinalabas ng Lunes ng umaga, na sinamantala ni Mait.

Nakunan pa ang paglabas ni Mait sa main exit ng kulungan at kaagad na pumara ng sasakyan.

Dahil sa nangyari, maaari raw masibak sa puwesto ang mga guwardyang nagbabantay nang makatakas ang preso bunga ng kapabayaan.

Tatlong buwan pa lang umano nakakulong si Mait dahil sa pagkakasangkot sa iligal na droga.

Minsan na rin daw nagtangkang tumakas si Mait pero hindi ito nagtagumpay.

Patuloy na pinaghahahanap ng mga awtoridad si Mait. -- FRJ, GMA News