Bagong silang na sanggol na iniwan sa isang kanal, natagpuang buhay

Nasagip ang isang bagong silang na sanggol sa isang kanal sa Aringay, La Union.

Sa ulat ng GMA News TV's Balita Pilipinas nitong Biyernes, sinabing isang dalaga na napadaan sa lugar ang nakarinig sa iyak ng sanggol.

Nang hanapin niya kung saan ito nagmumula, nakita niya ang sanggol na walang saplot sa isang kanal.

Isang lalaki naman ang mabilis na bumaba sa kanal na nasa gilid ng kalsada para kunin ang sanggol at dinala nila sa ospital.

Ayon sa duktor, kailangang operahan sa mata ang sanggol dahil nakitaan siya ng problema sa dalawang mata na tinatawag na "opacities."

Sa ngayon, patuloy na inoobserbahan ang kalagayan ng sanggol.

Base sa imbestigasyon, posibleng madaling araw umano nang iwan ang sanggol sa kanal.

Inaalam pa ng mga awtoridad kung sino ang mga magulang ng sanggol. -- FRJ, GMA News