Kolumnista at negosyante sa Davao City, patay sa pananaksak

Isang negosyante at kolumnista rin sa Davao City ang natagpuang patay at may mga saksak sa katawan sa Malalag, Davao del Sur. Ang sasakyan ng biktima, natagpuan naman na sinunog sa Malungon, Sarangani.
 
Sa ulat ng GMA news "24 Oras" nitong Lunes, sinabing base sa kuha sa isang CCTV camera, nakita ang biktimang si Ramon Garcia, sakay ng kaniyang kotse na huminto sa Candelaria Street, at tumungo sa direksyon palabas ng Davao City.

Sa sumunod na araw ay natagpuan na ang sunog na sasakyan ng biktima sa Malungon, Sarangani. Habang ang sakay nito na si Garcia, nakita naman ang bangkay sa Malalag, Davao del Sur.



Base umano sa imbestigasyon ng pulisya, posibleng hinarang at pinaksasaksak si Garcia nang huminto sa Candelaria street.

Sa follow up operation, na aresto ang dalawang suspek na magka-live in.

Ayon sa lalaking suspek, hoholdapin lang daw sana nila ang biktima.

Inaalam na ng pulisya kung may kaugnayan ang krimen sa negosyo o sa trabaho ni Garcia bilang mamamahayag na kolumnista. -- FRJ, GMA News