Ang putok ng baril na nagpasimula ng Philippine-American war

Sa dilim ng gabi noong Pebrero 4, 1899 sa bahagi ng Sta. Mesa, Maynila, isang putok ng baril ang bumasag sa katahimikan at naging dahilan ng pagsisimula ng digmaan ng Pilipinas at Amerika.

Ang nabanggit na unang putok ng baril na naging simula ng digmaan ay nagmula sa hawak na riple ni American Private William Grayson ng First Nebraska Volunteer brigade.
 
Pinaputukan ni Grayson ang direksiyon kung saan nakaposisyon ang mga sundalong Pilipino na pinaghinalaan niyang may masamang binabalak dahil umano sa narinig niyang mga senyas na pito at kislap ng ilaw.

Sa unang putok na iyon ni Grayson ay naitala ang unang sundalong Pinoy na nasawi sa digmaan ng Pilipinas at Amerika na si Corporal Anastacio Felix ng 4th Company ng Morong Battalion. Dalawa pang kasamang sundalo ni Felix ang nasawi nang gabing iyon.

Ang digmaan ng Pilipinas at Amerika ay natapos noong 1902 at tinatayang aabot sa kalahating milyong Pilipino ang nasawi, na karamihan ay mga sibilyan. -- FRJimenez, GMA News