Anti-Political Dynasty bill, hiniling kay PNoy na suportahan

Hiniling ng isang kongresista na kaalyado ng administrasyon na sertipikahan ni Pangulong Benigno "Noynoy" Aquino III  na "urgent bill" ang kontrobersiyal na Anti-Political Dynasty bill.

Sa kaniyang sulat kay Aquino, nanawagan si Caloocan City Rep. Edgar Erice, kasapi ng Liberal Party (LP), sa pangulo na suportahan ang panukalang para maging isang batas.

Ayon sa mambabatas, ito na ang tamang panahon para makapagpasa ng batas na lalaban sa dynastiya na matagal na umanong hindi umuusad sa Kongreso.

Inihayag naman ni House Majority Leader Rep. Neptali Gonzales II, na kabilang ang Anti-Political Dynasty bill sa mga tatalakayin nila sa kapulungan.

"The anti-dynasty bill is highly controversial and it is expected that many of them (na kongresista) would oppose it," pahayag ni Gonzales tungkol sa panukalang batas na aayuda sa probisyon sa Saligang Batas laban sa political dynasties.

Nakasaad sa House Bill (HB) No. 3587 o an Act Prohibiting the Establishment of Political Dynasties, "no spouse or person related within the second civil degree of consanguinity, or affinity to an incumbent elective official seeking reelection, shall be allowed to hold or run for any local or national elective office in the same elections."

Saklaw din ng panukala ang mga "illegitimate" at "half-blood" relatives.

Ayon kay Erice, makatutulong para matiyak ang pagpasa ng panukala kung sesertipikahan ito ni Aquino na urgent bill.

"It is the constitutional duty of the Congress to enact a law defining and prohibiting the establishment of political dynasties. We are respectfully requesting for your support on the enactment of the said proposal by issuing a certification declaring the same to be a
priority bill," aniya.

Dagdag pa ng mambabatas, "While several bills of similar import had been filed in the past, these were never acted upon during the previous Congress through the manipulation of unscrupulous politicians."

Sa pulong balitaan sa Malacañang, sinabi ni Presidential Communications Operations Office head Herminio Coloma Jr., na tatalakayin niya kay Aquino ang naturang usapin.

“Aalamin ko po kung ano o kailan ang kanyang sulat at aalamin ko rin kung ano ang naging katugunan doon,” pangako ng opisyal. -- RP/FRJ, GMA News